„Кога има лек, има век“, „За живот не се калкулира“, „Вашите задоцнети решенија коштаат живот“. Ова се дел од паролите истакнати на транспаренти на протестот пред Владата, на кој излегоа стотина граѓани во знак на поддршка на заболените од цистична фиброза. Меѓу болните е 18 годишниот Марио Нелоски кој од Струга дојде во Скопје, со цел да се побара од Владата да побрза за набавка на лекот што им е потребен.
18 годишниот Марио Нелоски е само еден од пациентите кои боледуваат од цистична фиброза. Стружанецот кој заедно со своите пријатели дојдоа во Скопје, рече дека со сите сили преку спортот се обидува да спречи прогресија на болеста, апелирајќи час поскоро да го добијат лекот „трифакта“, кој живот им значи.
Неговиот татко Благоја, како самохран родител, рече дека е тешка борбата со болеста на синот. Апелира до власта да не ги остава на цедило пациентите кои се молат за лек.
Цистичната фиброза е болест што не избира чиј домаќин ќе биде, во чиј организам ќе се всели и кого ќе избере за негов придружник вели Ивана Атанасовска од Асоцијацијата за цистична фиброза. Државата веднаш да обезбеди средства за терапија како во европските и балканските држави, со соодветен план и стратегија за опфаќање на целата популација која е заболена од оваа ретка болест.
Инаку, пациентите со ретки болести со месеци реагираат дека им доцнат терапиите, барајќи да се чуе нивниот глас. Овие луѓе на кои овој лекот живот им значи – излегоа на протест зашто надлежните кажаа дека ќе се набавел лек само за 8 луѓе, а другите ќе морале да почекаат.
Преземено: expres.mk
