Игор од Берово: “Господа празниците минуваат, а ние пациентите со цистична фиброза немаме време за чекање! Лекот Трикафта КОГА?

Млад пациент со цистична фиброза апелира до институциите кои немаат слух за нивниот проблем, ниту пак решение. Имаме право на лек, а Вие имате обврска да ни ги обезбедите!

Молкот од институциите причина за 31-годишниот Игор Пехчевски од Берово борбата за терапија за болните од цистична фиброза да ја води на социјалните мрежи.

За Игор, но и за останатите околу 130 пациенти со цистична фиброза лекот „трикафта“ буквално живот значи бидејќи не ги ублажува само симптомите, туку го лекува самиот причинител на болеста и го продолжува животниот век на пациентите.

Игор Пехчевски во изјава за нашиот портал бара одговорните институции да обезбедат лек и современи услови за лекување на сите пациенти, бидејќи како што вели самиот тој, не смее да се дозволи бројот на лица чија состојба се влошува, да расте.

Единствено што ни останува е да се избориме за нашето право, пишуваше Пехчевски на социјалната мрежа Фејсбук.

Во продолжение прочитајте ја неговата изјава и апел за помош до институциите.

Имаме право на лек за побезгрижни денови и за поквалитетна иднина.

Бараме современи, стандардизирани услови за лекување, бараме модуларна терапија за сите нас пациентите со Цистична фиброза.

Имаме право на лек а Вие имате обврска да ни ги обезбедитe!

„За лек не можевме дури ни да сонуваме. А сега кога тој постои, ние сепак го немаме кај нас во Македонија. Состојбата од ден на ден на пациентите им се влошува и за жал нема назад ако не е достапна оваа терапија. Сега веќе имаме неколку пациенти кои се постојано со кислородна поддршка и во тежок стадиум од болеста. Не смее да дозволиме овој број да се зголеми. Колку порано се започне со терапијата толку е подобро, бидејќи станува збор за прогресивна болест која прави оштетувања најмногу на белодробието, но засегнати се и многу други органи“, порачува Игор.